D' Wüehlmüüs 2016

Mer händ Freud, dr Blocher isch gange.
Är isch scho lang an sim Ämtli ghange.
Doch d Freud vergoht schnäll wie dr Blitz.
Dä Rücktritt, dä isch jo en Witz.
Denn wenn d scho gmüetlich ufschnufe wotsch,
stoht sini Tochter scho do, dä ...........

Wenn dr Donald Trump dur Amerika pöblet
und verbal astandslos alles zämemöblet,
denn isch dä Ton uns jo vertraut,
will me uf facebook so in d Taschte haut.

Wenn du vergnüegt durs Land wotsch fahre,
dich allne zeige mit dim Chare
und lydisch wäg dr Ussicht Quale,
sind sicher irgendwelchi Wahle.

China chauft Firme, billigi und die tüüre
und kein in dr Schwyz tuet drgege stüüre.
Uns macht das Angst. Mir mache nid mit.
Uns Wüehlmüüs bechöme d Chinese nid.

D Frau Doris Leuthard hett scho Glück,
die hett sone Tesla, es Bombestück.
Dä tuet sälber manöveriere
und ab Summer au für d Doris regiere.

D Brugger Fasnacht gits scho lang.
Mit dr Eröffnig chöme nid alli zgang.
D Stadtkanzlei, zum Bischpil, echli Niete,
tüen dr Rathussaal an Architekte vermiete.
Es git zu däm Saal kei Alternative,
drum starte mer e Durchsetzigsinitiative.

Vom Ortsteil Schinznach schrybt e Maa
e Brief, dä chunnt im Stadthuus a.
Dr Amme schickt e Antwort zrugg:
Freundliche Grüsse - Titus Meier - Bad Brugg

S Odeon setzt uf Erläbniskultur.
Die händ jetz off fascht rund um d Uhr.
Teatime wie z Ängland und Film mit Ässe
und bim Schälle-Ursli bin ich uf eme Schlitte gsässe.

Mit rote Zahle söll fertig sy,
drum füehrt Windisch Controlling y.
Nei lueg, au Windisch isch verwacht.
Alli andre händ das scho lang so gmacht.

Mer frooge, wär das mache sell?
Das isch em Sepp Blatter sini neui Stell.

Windisch Windisch Windisch Windisch
Windisch Windisch Windisch Windisch
Windisch Windisch Windisch Windisch
denn gang doch dört übere wenn d die nätter findisch.

Dr Migroslade isch renoviert.
Dr Schönscht in dr Schwyz wird gross plagiert.
Mir finde, es wär doch jetz no nätt,
wenn Brugg au sone Verwaltig hätt.

D Elefante vom Zirkus Knie,
die dörfe in Zuekunft dehaime sy.
Jetz nimmt eus Wunder wie das Brugg überstoht,
wenn der Dani Moser nümm ins Büro goht.

Dr Reto kümmeret sich um  die Alte.
Dr Willi tuet als Showmaster walte.
Dr Leo isch fründlich, dass er niemmer stört.
Und was d Andrea träumt, händ ihr jo ghört.
Dr Titus als Amme, d Andrea wott au
Und s Renne macht denn en dritte Pfau.

Dr Jürg Baur isch OK-Präsidänt.
Das chönnt nid sone gueti Wahl sy, emänt!
D Gfohr bestoht und toll wär das nid,
dass das Stadtfescht es Samichlausträffe git.

Vo de Konfettispalter händ mer no immer kei Värs.
Mer händ dänkt, das neue Koschtüm, das wär's.
Mer wänd drum do drei Koschtüm teschte,
mit wellem d Spalter am liebschte feschte.
Eh, voilà! Schwarz und wiss wie Schnee.
Die händ au nach 40 Johr kei besseri Idee.

Dr Hugo wott nüm Chefspalter sy.
Jetzt händ alli Angscht mit dr Fasnacht sigs verby.
Wenn d Fasnacht z Brugg wäg eim Maa fallt,
denn isch s verby. Au mir sind z alt.

Dr neui Bundesrot in Bärn
hett d Dütschschwyz und au s Wälschland gärn.
Denn sin Name Guy Parmelin
rymt sich uf Wy und au uf Vin.
Für uns chas dütsch oder französisch sy.
Mer händ gärn vin und suffe Wy.
Nur eini isch sit Johre Stier,
die nimmt statt Wy halt lieber Bier.