D' Wüehlmüüs 2017

D Konfettispalter sin jetzt e Verein.
E Zunftmeischter bruche sie so e kein.
Und passend zum Salzhuus, das isch dr Zucker,
organisiert dr Umzug e Chriesisteispucker.

E Huffe Sache händ d Lüüt berüehrt:
Zum Bispiel, wo ane die Trump-Wahl füehrt,
dass England nüt meh vo Europa wott wüsse
und dr Junker eusi Somaruga tuet küsse.
Doch am meischte Clicks vo allne hett
dr Schneider-Ammann wo zu de Chranke redt.

Dr Trump seit: "Mer wänd kei Mexikaner!
Amerika nur no für Amerikaner.
Ich wott, dass d Indianer das au verstöhn
und ändlech zrugg uf Indie göhn."

Aarau schrybt Brugg: Für Asylante
isch das Baraggedorf bim Stapfer die bescht Variante.
Brugg schrybt zrugg: Mer müend eus wehre,
bi eus tüen dört drin Chinder lehre.

D Franziska Roth isch neu im Regierigsrot...
juppeidi und jupeida

Dr Fritz ladt s Heidi zumene Usflug y.
Am Hochzytstag sölls öppis Bsundrigs sy.
Är tuet en Erläbnisusflug bueche:
Sie sölle uf em Bözbärg dr Stärne sueche.

De Rigoletto hetts verschifft.
Finanziell isch dä abe wie en Lift.
Die hätte trotz Schiff chönne s Glück erzwinge:
Hätte die nur mi lo singe.

Brugg isch vonere Pleiti wyt ewägg.
Aber s Nochberdorf, das hett dr Drägg.
Sie müend jetz d Bossertschüür verchaufe.
Trotz Charme tuets finanziell nid laufe.
Für d Reh wird die Südwestumfahrig 
bestimmt e schrecklichi Erfahrig.
Au für d Habsburger tuet's öppis choschte:
Sie chöne nümm gradus uf Windisch go poschte.

Windisch, Windisch, Windisch, Windisch,
Windisch, Windisch, Windisch, Windisch.
Windisch, Windisch, Windisch, Windisch,
das, wo d vo Habsburg us nüm findisch.

Jetzt wänd die do e SVIZRA mache.
Sind mer ehrlich, das isch zum Lache.
Dr Knecht isch natürli au derby.
Fallt däm denn nüt meh gschyders y?

Brugg seit zur Bildigsinitiative njet.
Es hett bewiese, dass es Köpfchen hett.
Wohär das chunnt, dasch klar, das weiss i:
Wäg dene Gratisbüecher uf em Eisi.

Uf ere App chasch jetz alles erfahre vo Brugg:
Wenn chan ich ins Museum und wie chum ich vo Habsburg zrugg.
Nur öppis hani niene gfunde:
Wo cha n ich, wenn ich muess, go pfunde.

Wenn ich dr Dani Moser wär,
denn müesst ich jetzt säge, ungefähr:
Ich chum s nächscht Johr nüm. Ich ha gnueg. Ich gang!
Zum Glück isch das do kei Neujohrsempfang.

Ich muess no säge an dere Stell,
egal ob me's gseh oder vertusche well,
am Moser si Rücktritt hett Signalwirkig gha:
Au Oberwil-Lieli muess e neue Amme ha.

Es git scho Lüüt, wo Alass gänn,
dass sie dr Sitz vom Amme wänn.
E Frau, drüü Manne, weisch wie schyter,
bi dene giecht's nid besser wyter.

Dr Richard Fischer, das neue Gsicht,
wott in Stadtroot, das isch e Gschicht.
Wenn dä gwählt wird, mein Gott Walter,
sin dört scho zwei im AHV-Alter!

Die Wasserstoffposchtauto fahre suuber und sind en Hit.
Aber wirtschaftlich sind sie trotzdäm nid.
Das isch wie bim Stadtroot: Alles nätti Lüüt.
Aber wirklich bruuche chasch sie für nüt.

Dr Federer hett eine druff.
Dä chrampft und kämpft und git nid uff.
Viellicht passiert das jetz in Brugg
und dr Alder chunnt als Amme zrugg.

D Repol rettet es Maitli us dr Aare.
Sie büesse au die wo mit em Chare zschnäll fahre.
Wenn mi Frau mich schloht, müend sie mich rette.
Das schaffe die nie, do tuen ich wette.

An d Polizei han ich no e Bitt:
Verhaftet mich und schoned mich nid.
Ich wott's au erläbe und derbi lache,
wenn d Lüüt für mich e Volksfescht mache.

Au mir wärde mängmol duuregschüttlet.
Denn wird plötzli an Prinzipie grüttlet.
Drum bruuche mir das Johr, es tuet echli weh,
e Wysse, es Bier und e Pfäffermünztee. 
Doch das isch alles geschter gsy.
Hüt bruuche mer nur no wysse Wy.