Oschterzäpfe

Ich ha mol be der Uuskunft gschafft, die eint het welle wösse,

öb ich ächt no leduc sig, sie möcht mech so gern kösse.

„Die Nummer lautet“ han ich gseit „079 tüt tüt.“

Nei vo miner Nommere, do säg ich dere nüt!

Wenn d'Tante us em ferne Oschte, die Sau, die Arabisch,

het so gern schwizer Wichtelgschänk, was gisch ere wenn't dra bisch?!

Kei Halal-Toblerone, Lindor-Chogle, nei du Joggi:

S'bescht för deet sind Panzerfüscht & da Jamal Khashoggi.

D'Glichberächtigung bim Militär esch bald erreicht,

die erschti Frau wo zwunge wird, d'Freu Amherd schii hets preicht!

Si will Ju-52 jetzt chaufe und s'Budget drastisch chörze,

well die nor halb so vell wie d'FA-18 tüend abtörze.

D'Mozartchogle sind vo Salzburg, d'Wienerli aus Wien,

d'Pariser sind vo Frankriich, & d'Berliner vo Berlin,

D'Olma-Bratwurscht vo Sanggalle, us Dijon chonnt de Sämf,

vermodereti Stei, „Les Pierre Maudet“ die sind vo Gämf.

„Wenn sie mich jetzt fragen würden, was ich für einer bin,

käme mir glaub nicht zuerscht ein Juflicheib in Sinn,

ich hab doch erscht zur Red' über mein' Rücktritt angesetzt,

und zmittst in meiner Wortmeldung da ischt mein Sitz scho psetzt.“

De Erdogan muesch wähle, denn chonnsch uf Bewährig frei,

knapp 120 Prozänt wählt ihn, so laufts i de Türkei,

In Russland chasch per Gsetz nor no im Putin d'Stimm abgeh,

dasch alles demokratisch suuber – da chasch Gift durf neh!

Wottsch du Prieschter be de katholische Chile werde,

denn muesch du met em Strofregischter-Uuszog dech bewerbe,

nei noh meh Teggscht das bruchts gar ned - es wird dee selektiert,

wo de längscht ond spannendschti – so Uuszog präsentiert.

Europa brännt und bröckelet – d'Frau Merkel het de Fruscht.

Erläbsch es jetzt au hutnöch im Europapark in Ruscht,

de Grossbrand wär schnell glöscht gsii, doch händs müesse Ziit ibüesse,

well d'Füürwehr het wie alli and're zwee Stund aastoh müesse.

D'Frau Merkel git de Löffel ab, e Gable mues noh länge,

D'Annegret Kramp-Karrenbauer sell sech d'Finger jetzt verbränne,

För'd Fasnacht chönnts ned besser sii, das esch doch optimal,

en Dütschi wo heisst Karrenbauer – das schmöckt nach Abgas & Skandal!

D'Franzose wännd vom President, dass er si doch verschohn',

de Macron de gseht nor no rot, vor luuter „Gilet Jaune“.

Esch logisch, bruchsch jo kei Bänzin, zom vorwärts cho „En Marche“

und wenn de so wiitergoht, heissts „President - am Arsch“.

Dass mer Schwizer a de Schwede leider immer weder scheitered,

im Fuessball, Curling, Ski ond Hockey - das esch mir verleideret.

Doch bin ich mir das lengschtens gwöhnt – ich tue d'Fassig nömm verliere.

Ich scheitere doch jedes Mol bim Ikea-Gschtell montiere.

De Pierin Vincenz händs iiglocht, er hets halt chli verbockt,

doch niemert weiss, dass er im schwarze Turm esch drinne ghockt,

mit Hilf vo osse het er sech abgseilt ond esch grad hei,

well sini Buude haltet Wort: „Wir machen den Weg frei.“

Uf 'Doppel-Vakanz im Bundesrot folgt 'Doppel-Damewahl,

En Sieg bem Doppel Mixed, bem Waffe-Export e Doppel-Moral,

En dopplet so trochne Summer gha, ich will dopplet so vil Stutz,

ond de Doppeladler stoht ab sofort under Arteschutz.

Würm und Chäfer ufem Tisch – Nei, ned emol förd' Chinde,

trotzdem chasch die Säckliwiis, be ois dehei jetzt finde,

doch machemers doch eifach grad genau eso wie früehner,

mer mached lieber Eier drus: mer gänd das Züüg de Hüehner.

Liebe Roger Federer, das settsch erfahre haa

I de Tennis-Wält besch du för eus de beschti Maa,

de stärchschti Ufschlag aber max der au ned rechtig passe

de händ no immer Prämie vo de Schwizer Chrankekasse.

Es tuet e Frau uf Brüssel gah, Brüssel gah, well si will d'EU ganz verlah,

tralalalala, tralalalala, sie will jetzt de Brexit haa, tralalalala.

D'EU die will de Backstop phalte, Backstop phalte, d'Frau Mey die will au dee usschalte, ........ soscht chönn sie s'Land nömm zämephalte .....

Au de Cassis tuet uf Brüssel gah, Brüssel gah, de Reset-Chnopf ge sueche gaa, ....... es Rahmeabkomme will er haa. .... 

Es Rahmenabkomme wämmer ned das gseht mer ois wohl aa, juhee,

..ned ufe, ned abe, ned links, ned rächts, ned vöre, ned hindre, ned links, ned rächts

Trittst am Morgen tot daher,   ...wäg em...

Mitholz Munitions-Lageer, 

oder händs de Glyphosat -Gränzwärt weder ufetoo

Vo Tel-Aviv uf Jerusalem,

Holje, gugu, holje, gugu,

so lönd mi doch, dasch ned so schlimm,

holje, gugu-gugu.

Ich mach nor immer was ich will,

holje, gugu, holje, gugu,

ha no Idee-e zimli vell!

holje, gugu-gugu.

Weine nicht wenn die Sonne brennt,

dam dam, dam dam,

ich kenne ein wo das Wätter nennt,          

dam dam, dam dam                            

Marmor, Stein und Eisen glüht,                 

aber weisch das macht eus nüüt,              

alles, alles tröchnet uus,                     

doch das macht eus nüüt us.        

Schiffli fahred dufem Meer,      

mit hunderte vo Container,

chonnt en Wind und chunnt en Sturm,

rüert grad all Container um.

Det äne am Bärgli det staht e bruni Chue,

ich säg si sell mol Güügge ond los ere zueh,

doch ghör ich kes Horne es bliib alles still,

ich glaub dass die Chue ihri Horn gar ned will.

Ich weiss au wieso d'Chüe so Glogge a hönnd,

das esch well die Hörner be allne ned göhnd.

Z’Nacht a de Bar do starrt er lang uf ehres Hinderteil,

si chert sech ond er tänkt vo vor’ esch si ned minder geil,

er heissi Robert - ond si seit ganz knapp „Heidi“, 

„Läck, das Arsch!“ - das tänked schliesslech beidi.

s'Blondie vom Chef töf höt s'neue Auto fahre,

si fahrt ad Tankstell ond will tanke jetzt de Chare

es git e riisigi Kolonne, lueg mol hinde.

well sie de Tankstutze am Tesla ned cha finde.

Nei, ufem Mars wirds nie e Coop-Filiale geh.

1.Auguscht-Füürwärch das hämmer eus loh neh,

ond i de Flöss ond Bäch händ d'Fisch doch zimli troch,

de Stephen Hawking de verschwindt im schwarze Loch.

Rond um mis Land – 3 Meter 10 höch, bruchts e Muur,

nor esch mi Frau degäge – die esch halt chli stuur.

Doch nach 5 Woche Hushaltsgälder völlig gstriche,

sind ihri erschte Zwiifel gäg die Muur scho gwiche.

„Ja wir schaffen das!“ het sie probiert z'bewise,

doch eri gröschti Knacknuss das bliibt d'Flüchtlingskrise,

di neuschti Flucht tuet'ere doch am meischte weh:

d'CDU-Wähler-Flucht zo de AfD.

Wenn du nor Sonnecrèm' töfsch chaufe för id'Nacht,

ond nor wennt Vegi besch töffsch' Schwiinsfilet zom Znacht,

denn findsch es au ok, wenns nor Waffe tüend bezieh,

wenn's der verspräched fescht, sie bruuched si gar nie. 

Im Basko-Supermärt sind Gschtell scho lang halb leer,

sit di letscht Lef'rig cho esch, eschs ewig her,

wo esch de Luigi ächt? de chonnt eifach nömm zrogg,

sin Laschti stoht no immer z'Genua uf de Brugg.

Sie chonnt is Reschterant, das het scho paar chli gschtört,

well e Lawine ned is Reschti ine ghört.

Doch s'schlimmschte esch - drom händ all' heftig reklamiert,

s'esch alles psetzt - ond sie het ned reserviert.

Schüsst mol en Jäger z’Merischwand uf siner Pirsch,

zwoi grossi Auge ab ond meint es seig en Hirsch,

doch si händ d’Leuthard Doris weder integriert,

jäää, met me’Nachtsichtgräät wär das halt ned passiert.

Wenn die deet z'Bade eres Bad ned ändlech boue,

denn schwindet zimlech schnell au no s'letscht Vertroue,

mer mues glaub d'Stadt umtaufe, wie, das esch no offe,

anstell vo „Bade“ passt besser „Warte“ oder „Hoffe“.

Wenn denn i knapp 10 Johr a de nöchschte Badefahrt,

de Mario Botta ebe au uf Bade fahrt,

ob ächt s'Thermalbad fertig seig, wo all druuf plange,

jo scho ganz glii, doch seig s'Thermalwasser uusgange.

Bade bout s'Bad - Aarau ond Züri 's Stadion,

doch sind alli erscht i de Planigs-Situation,

de Vorteil, wenns no duurt – s'esch logisch au för eu,

Je spöter s'bout wird umso länger ischs no neu.

Sit neuschtem fluech ich, quäle Tier und tuen au lüüge,

& au för chorzi Strecke' wenns goht immer flüüge,

vom guete Mänsch sii – do hani nämmlech gnue.

Es bringt jo eh meh – de Himmel z' Bade göch jo zue.

Doch trotzdem pschiss ich wörklech nie bem Chartespiele,

ich gib de Vortritt – wenn i mues – ond goh au z'Chile,

ich spände Gäld för armi Lüüt & be nie psoffe,

well ... de Himmel wärdi Frei ond bliibt drom offe.

Lauffohr ond Alteburg sind lengschtens annektiert,

Umike, Schinznach-Bad sind au glii integriert,

Bözberg ond Rinike, das wörd doch au no passe,

wenn nor d'Ändlager-Frog ned wär, es esch zom hasse.

Ich glaub au Villige ond Mandach wäred z'haa,

ond s'Eigenamt stoht jo scho chli verlohre da.

So hätti Brogg doch ändlech mol echli e Grössi,

gäg Aarau, Bade git mer sech denn kei meh Blössi.

De ganz Bezirk de esch denn zimli fusioniert,

zumindescht deet wos echli passt ond funktioniert,

E 20 Johr sinds nor no 4 Gmeinde wott do findisch,

es sind no Brugg und Thale, s'Müendl ond no Windisch.

....... phuu

.......     tschutschu

ja ich weiss, das tönt alles zimli schräg,

das längti höggschtens no för z'Windisch id Schuelpfläg.

Vo dene Fuessgänger do hani langsam gnueg,

chörzlech – ich säg eu - vor de Kanti vo mim Bueb,

tüed mer zwoi Chindsgichind fascht under d'Redli springe,

won ich min Junior an Klima-Streik will bringe.

Das Formel-E-Ränne vo Züri goht uf Bern,

doch händ die Berner doch das Gjufel ned so gern,

doch gits das Städtli namens Brugg - au a de Aare,

do wäreds froh drom. Do tuends gern zögig umefahre.

Ich glaub vom Aeschbi hämmer gnueg, de hämmer gseh,

bringed am Fernseh lieber d'Fraue echli meh,

und för in Ständerat do weiss d'SP genau:

do esch de Wehrmuet - halt vell di besser Frau!

Wenn ich mol 92zgi be tue-n ich früeh-pangsioniere,

ond zwoi Johr spöter tüend denn Brugg und Windisch fusioniere,

Doch s’esch ned wohr, ich träume nor, so zwick mi doch in Arm,

S’esch alls denn no wie früehner: eis esch rich ond eis het Charme.