Rollator Grosis
Du, Josi
Jo, Rosi?
Jetzt gaht’s denn los!
Wo müemmer do uf d’Stross?
Chumm, mer müend dert zu dere Stäge!
Jesses, wer tuet eus au de Rollator do ufeträge ?
Du, Josi
Jo, Rosi?
Esone Stäge isch doch ned Rollatore-Gerächt!
Dasch eso steil, es wird mer grad schlächt!
Du, Josi,
Jo, Rosi?
Do ghörti emol en Rampe ane, so chunnsch jo nie richtig ufwärts!
Hesch rächt, die meinid halt, met eus Alte giengs nur no abwärts!
Du, Josi
Jo, Rosi?
Zum Glück sind die Brugger hilfsbereit und händ eus die Chäre do ufe treit!
Vele, vele Dank, jetzt fende mer de Rank !
Du, Josi
Jo, Rosi ?
Jetzt lueg doch emol, die viele Lüt!
Du, aber gäll, die send aber ned öpe wägen eus do!?
I glaub ned – aber esch doch schön, dass mer emol eso viel Bsuech händ!
Du Josi
Jo, Rosi?
I glaube fascht, die warted uf öpis!
Aso chumm, mer stelled eus emol vor:
Ich bin d’Rosi - und ich bin d’Josi - und zäme simmer d’Rollator-Grosi!
1.
Du, Josi
Jo, Rosi?
Wenn i do so umeluege, do die grosse, dicke, höche
Muure rundume, die erinnere mech a öpis!
Was meinsch demit?
Weisch, dä z’Amerika, wo so gärn en langi, grossi Muur wett ha…
Ah dä, wo meint, d’Wält bestöchi nur us Amerika?
Genau dä mein i! Dä würd die Muur au gschiiter viereggig boue,
gschlosse, mit eme schmale, chliine Ygang!
Super Idee! Und für a d’Eröffnigsfiir ladet er denn alli sini Kollege ii! Zum Biispiel de Erdogan und der Orban
… und de Putin und de Xing Ping vo China
… und sicher au de Kim-Jong-Un vo Korea!
De Bolsonaro und de Maduro würdid au no passe !
Und denn chönnted’s zäme Jasse!
Vo mer us, uf jede Fall würde mer dem Träffe denn WMM säge!
Wie bitte? Was söll das sii?
Das heisst dänk World-Muur-Meeting!
Jä so, find i guet! Und denn?
…und wenn denn alli die Chaote zäme schnöred, als gröschte Gäg, Gsplüssed
mer si y und rüered de Schlüssel wäg!
2.
Du, Josi
Jo Rosi?
Hesch’s ä ghört? Es wärdi langsam schitter!
De Meeresspiegel stiigi, immer wiit und wiiter!
Am Nordpool sig s’Ys scho lang am knaxe
Und z’Amsterdam chönni s’»Gras» au nümme Waxe!
Eusi Klimapolitik, die chame rauche!
Wenn das so wyter goht, denn semmer au gli z’Brugg am tauche
Jo und d’Konsequenz vo dere Politik, s’isch wohr:
zum Überläbe bruched mer in Zuekunft en Unterwasser-Rollator!
3.
Du Rosi
Jo Josi?
Im Enteteich hinder eusem Huus hetts nume Plastikmüll, es isch en Gruus!
Ohrestäbli, Raschelseckli und viel Pet, Bsteck und Teller, es ganzes Set!!
Das isch alles nümm zum Lache, mer müend öpis für eusi Umwält mache!
Ja klar, das hani au grad welle säge, jetzt gömmer go sammle mit eusne Wääge!
Du, Rosi!
Jo Josi?
Mer giengte au is Meer go Plastik sammle, wenn’s ned a Unterwasser-Rollatore würdi mangle!
Jo, was meinsch, wenn alli Grosis giengte goge ruume,
Und alli Schüeler würde wäge de Grosis stuune!
Aber das ewige Gschwätz und Blabla chasch vergässe,
s’beschte wär, die Politiker müessted dä Plastik doch sälber fr…ässe!
4.
Du Josi
Jo Rosi?
Hesch scho ghört?
Was?
Die 3 vo Brugg si wieder zrugg
Jo 2 sind immer scho do gsi
jo – aber das send jo 2 armi Schnitzelbänkler – weisch dr 3. het es Problem!
Meinsch du dä wo im Stadtroot isch, derzue no Schuelleiter und Lehrer?
Jo, dä wo s'letscht Johr an der Olympiade gsi isch, als Volontär und a der Fasnacht
gfehlt het.
Du, dä isch aber au no Grossrot und Dozent a der Fachhochschuel!
Dä isch doch no vieeel meh!
Dä isch au no professionelle Samichlaus, het e Familie und natürli en extrem liebi, verständnissvolli Frau!
En Autonarr isch er au no! Du de het e sone Tschinggerucksack, ich weiss gar nid
wie dä mit sinere Längi dört ine chunnt!
Jo und ebe Schnitzelbänkle tuet er bi de 3 vo Brugg und jetz au no z Bade
und denn isch er schyns no OK Präsidänt vo so me ne Wurscht mit Brot Fescht !
Er macht jo alles nit so schlächt - ABER ich frog mich wie macht dä das nur?
Das goht nid mit richtige Dinge zue und her – dä schluckt doch sicher
es Medi, es rechtigs Wundermittel muess das si!
Jo – und es isch scho verdächtig – er tut nämlich, als Hobby sozäge, au no intensiv Langlaufe!
Was Langlaufe – wie der Dario?
Jo nur nit so schnäll - aber s Motto blybt: Langläufer leben gesünder!
Ich hoffe nur er ghört nid au no zu dene Dopingsünder!
5.
Du, Josi
Jo, Rosi?
Chunntsch au mit zum Urs in Kurs?
Jo was sölle mer denn im Kurs bem Urs?
De bütet es Seniorefitness aa für die, wonen E-Rollator wännd haa!
Dasch aber en gueti Idee, do melded mer eus aa! Denn müemmer eus nümm vo
allne überhole laa!
Jä und s’Bremse müemmer denn au no lehre,
susch tuets eus denn i der Kurve chehre!
Uf jede Fall, nach dem Kurs semmer voll parat
Mache ufem Rollator sogar no de Spagat
Zum Glück isch Tempo 30
ned cho!
Denn met eusne E-Rollatine und eusere Super-Fitness isch das Resultat für eus jetzt Balsam
Jo, Tempo 30 wär für eus definitiv viel z’langsam!
6.
Du Josi!
Ja, Rosi?
Mit dene Gender-Sache, do isch’s mer nümm zum Lache!
Weisch eifach ned, wie mer’s tuet richtig mache!
Isch doch klar, es git Bürger und Bürgerinne,Presidänte und Presidäntinne
Jo, aber es happeret scho be der Regierig
En Ammann wiiblech, do beni neugierig!
Frau Ammann, das isch ned schwär,
uf jede Fall besser, als wenn’s «Ammännin» wär!
Ja und zum Biispiel do be eusne Wääge,
müesst mer dene öpe «Wäginne» säge?
Aso Rollator tönt wie «Terminator»,
Das chunnt mer scho vo demhär ned sehr vertrauenserweckend vor!
«Rollatine» würd mir viel sympatischer schiine!
Und min Stock wär denn d’»Stockine»
Du, und was mer au no z’dänke git:
Dass es do inne ned nur Gäst, sondern au Gästine git!
Klar, und stahn ich vor em Altersheim, han ich jedes Mal de Gender-Splean:
Wohn ich jetzt im Süessbach oder im Süessbach - in?
7.
Du, Josi,
Jo, Rosi?
Im Altersheim verlange’s immer meh!
Do tuet eim nur s’Ligge im Bett scho weh!
Wenn d’suscht no öpis muesch ha,choschtet das extra!
D’Stützstrümpf aalegge und Physio,
Dusche, Fuesspfleg, Coiffeur und Ergo
Medikament, Augetröpfli und Barthoorentfernig,
Das alles zellt sech, das isch ned wenig!
Nur bem Ässe hesch freiy Wahl
Aber s’Usläsen isch e Qual!
Nasi Goreng, Riz Casimir und Curry
Hani no nie gha, das schwöri
Es wird alles schön ufem Täller serviert
Und der Höhepunkt vom Tag isch garantiert:
Das 5Stärn-Ässe bechunnsch püriert!
8.
Du Rosi!
Jo Josi?
hesch scho ghört?
Was?
Sie wänd in der Stadt e Bewegigszone ifüehre!
Du, aber das heisst richtig Begegnigszone!
Nei, weisch, im Neumarkt obe – dört wo sich alles bewegt......
Ou du,geschter isch mir dört au öppis sehr bewegends passiert
Bisch mit em Rollator über e Bodeplatte gstolperet?
Nei – eine vo nere Gruppe het mir öppis noche grüeft
Was?
Es isch usländisch gsi : hey e mol ankar geilischt el charra!
Und, weisch was das heisst?
Hey alti hesch en geile Chare!
Aber du wo chunnt denn jetzt die Begägnisregion?
He dänk uf em Eisi!
Aber dört müesstis denn ehner Ruhezone heisse!
Wieso?
He ganz klar – chunnsch i die Zone ine, denn wirds langsam ruhig und immer stiller, so quasi als Vorbereitig für das, was nochher chunnt!
Jäh, meinsch nid öpe d Altstadt?
Doch dört isch es jo totestill....
Und weisch was au no cool wird für eus Seniore?
Nei, was meinsch?
He dänk die persönliche Begägnige! Do hocksch in aller Rueh uf em Bänkli
und chasches voll gnüsse,
wenn der Andi Küng mit der Channe chunnt cho Wasser hole im Brunne,
zum sini Blueme i der Altstadt z’güsse
9.
Du, Josi
Jo, Rosi?
Wo gömmer en Kafi go neh?
Da chamer efang überall, mer weiss nümme wohee!
Im Fridolin, oder bem Frei?
I der Migros oder bim Mor i der Bäckerei?
Bim Moser oder im Süessbach unde?
Sogar i der Biblio hani en Kafimaschine gfunde!
«Teatime» chasch au mängisch im Odeon ha
und i d Hofstatt chönnte mer au emol gah!
S’Papillon gits au no z’Lauffohr, aber dasch mer z’wiit
Jetzt, wo’s denn au no das « Stadtklatsch » nebem Bio-Meier git!
Du, de het glaub au no es Tischli anegstellt,
D’Lina heb sech dert emol en Kafi bstellt.
Si heb denn ned chönne uf de höchi Stuehl ufehocke,
und miteme Kafi im Stoh, chönntsch
mech also ned locke!
Du, Josi,
Jo, Rosi?
Wenn mer i der Stadt überall wänd go Kafi trinke,
denn tuet eusi Rente brutal sinke!
Du, ich han en Idee! Für das müend mer jetzt au es Krautfinding lanciere!
Ou du, i glaub, do würd i mi aber schuurig geniere!
Werum? Do debii isch doch nüt chrumm?!
Ich ha no vo deheime glehrt, die hohli Hand, das macht mer ned!
Überhaupt, das moderne Zügs mit dem Krautfinding uf allne Kanäl, das passt mer eifach ned!
Hesch rächt, wenn mer sech das rechtig überleit, dem hett mer doch früehner ganz eifach Bättle gseit!
10.
Du Josi
ja Rosi?
Jetzt bliibt is nume no eis:
Hasta la vista, mer gönd jetzt vo der Pista !
Mutschos grassias Segnoritas i Mutschatschos !
Grazias por el lavor de Carneval y para la Super-Decoration !
Es una Fiesta mutscho grandioso!
Mir dos Grosis spendidon tuusig mol Gratulacion!
Los Grosis mit de Rollatinas säged jetzt Adios!